ဘ၀တက္ကသိုလ်
သာလှ။ ။လူတစ်ယောက်ကပြောတယ်၊ ဘုရားကခင်ဗျားတို့ကိုမချစ်ပါဘူးတဲ့။
ဖေမြ။ ။ကိုယ့်မိသားစုအကြောင်းသူမသိပါဘူး ကိုသာလှ။ ကျုပ်မိန်းမ ကျုပ်ကို ဘယ်လိုဘယ်လောက်ချစ်တယ်ဆိုတာ ကျုပ်တို့လင်မယားချင်းသာသိတာ။
သာလှ။ ။အိမ်ထောင်ရေးအကြောင်းပြောနေတာမဟုတ်ဘူးနော် ကိုဖေမြ။
ဖေမြ။ ။သဘောတရားအနေနဲ့ပါ။
သာလှ။ ။မေတ္တာရှင်ဆိုရင် အားလုံးသာတူညီမျှရှိရမှာပေါ့ တဲ့။
ဖေမြ။ ။ကိုသာလှရယ်- ကျုပ်ပြောပြီးပါသကော-ဗျာ။
သာလှ။ ။မရှင်းသေးဘူးဗျ၊ ထပ်ရှင်းပါဦး။
ဖေမြ။ ။ကျုပ်တို့ဟာ အချိန်တန်ရင် အိမ်ပြန်ရမှာ။ ကောင်းကင်နိုင်ငံတော်မှာရှိတဲ့ ဘုရားသခင်ရဲ့ ရင်ခွင်တော်ကို ကျုပ်တို့ပြန်ရမှာ။ ကျုပ်တို့က သူ့သားသမီးတွေလေ။ တစ်နေ့ကျ အဖေ့ဆီ ပြန်ရမှာပေါ့။
သာလှ။ ။ပြန်တာတော့ဟုတ်ပါပြီ၊ ယ္ခုလက်ရှိဘ၀မှာရှိတဲ့ မတူညီမှုလေးတွေကကော၊ ဘာကြောင့်လဲ။ ဥပမာ-ချမ်းသာတာတို့၊ ဆင်းရဲတာတို့၊ ချောတာတို့၊ ရုပ်ဆိုးတာတို့လေ။
ဖေမြ။ ။သုခ ဆိုတာ ဒုက္ခ ခံဖူးသူမှသိတာ-ကိုသာလှ။ ဘ၀တက္ကသိုလ် လို့ တင်စားလောက်တဲ့ ဒီလူ့လောကကြီးမှာ ကျုပ်တို့ဟာ တက္ကသိုလ်တက်နေရသလိုပဲ တစ်ယောက်နဲ့တစ်ယောက် Subject မတူကြပေမယ့် တူမှာက ပျော်စရာတွေတွေ့မယ်၊ ငိုစရာတွေလည်းတွေ့မယ်၊ နောက်ပြီး တစ်ချိန်လုံးကြိုးစားနေရမှာပဲ စာမေးပွဲတွေ၊ ကျူတိုရီယယ်တွေ၊ စိန်ခေါ်မှုတွေနဲ့။
ကျောင်းသားတစ်ယောက်ဖြစ်လေတော့ ကျောင်းစည်းကမ်းတွေလိုက်နာရမှာပဲ။ မလိုက်နာရင် ၀ါနီ အပေးခံရမယ်၊ ကျောင်းထုတ်ခံရမယ်။ ကြိုးစားမှု အတွက်ဆို ဆုပါရဦးမှာ၊ အဲဒီဆုဘယ်သူပေးလဲဆိုတာကိုစဉ်းစား။
သာလှ။ ။ကျုပ်ကိုမစဉ်းစားခိုင်းပါနဲ့တော့ဗျာ၊ ပြောမှာသာပြောဗျာ။
ဖေမြ။ ။ အဲဒီဘ၀တက္ကသိုလ်ကို ဘယ်သူတက်စေသလဲ။ ဘာအတွက်လဲ။ အဆုံးမှာဘာရှိသလဲ။ အဲဒီလိုမေးခွန်းလေးတွေ ကိုယ့်ဟာကိုယ်ဖြေကြည့်ဗျာ။
သာလှ။ ။ကျုပ်ဖြေကြည့်မယ် ကိုဖေမြ။
ဖေမြ။ ။လုပ်ဗျာ။
သာလှ။ ။ကျုပ်တို့ သုခ ကိုသိစေဖို့ ဒုက္ခ ကိုကြုံစေတာဖြစ်မယ်။ ဘာဖြစ်လို့လဲဆိုတော့ ကျုပ်တို့ကိုစဉ်းစားဥာဏ်ပေးထားတယ်မဟုတ်လား။ စဉ်းစားဥာဏ် သာမရှိရင် ဘာဆိုဘာမှ သိတော့မှာမဟုတ်ဘူးလေ။
ဖေမြ။ ။ဟုတ်တယ် ကိုသာလှ၊ အဲဒီ အသိဥာဏ်လို့ခေါ်တဲ့ စိတ်နှလုံးကိုသာ ဘုရားသခင်ကအလိုရှိတာ၊ လမ်းဆုံးမှာ ကျုပ်တို့အတွက် အောင်ပန်း ကိုချထားမှာတဲ့ဗျာ။ လူတွေအတွက် သေဆုံးခြင်းဆိုတာ ဆုံးရှုံးမှု လို့ ယူဆကြတယ်မဟုတ်လား။ ဒါပေမယ့် ကျုပ်တို့ ဘုရားသားတွေအဖို့တော့၊ သေဆုံးခြင်းဆိုတာ သင်တန်းပြီးဆုံးခြင်းလောက်ပါပဲဗျာ။ အချိန်တန်တော့ အိမ်ပြန်ကြရမှာပဲလေ။ ဒါပေမယ့် အောင်ပန်းလေးကိုင်ပြီး ပြန်လာတာပဲ အဖေကမျှော်နေမှာပါ။
သာလှ။ ။အေးဗျာ-ကိုဖေမြ- ပျော်စရာတွေတွေ့ပြီး အိမ်မပြန်ချင်မှာ စိတ်ပူရတယ်။
ဖေမြ။ ။ဘာပဲဖြစ်ဖြစ်ဗျာ၊ အောင်ပန်းလေးကိုင်နိုင်ဖို့ဆိုတဲ့ အဖေ့စကားတော့မမေ့ပါနဲ့။
God Bless You
Brother Aung
